بما اني مبقتش بتفرج علي حاجة في رمضان غالباً .. لسه مخلصة المسلسل ده .. تابعته كام حلقة في التليفزيون وبعدين مقدرتش وخلصته ع النت !

مش هتكلم ع ان المسلسل حلو .. أو علي سليم، واد ايه هو وسيم وشيك، ولا علي رد فعله لما أمينه اعترفتله بحبها ..!

هتكلم من منظور مختلف شوية .. اللي هو ...!

- أمينة علشان تعبت خطيبها سابها!

- علشان تعبت راحت الجمعية واتعرفت علي سليم!

- علشان تعبت كان صعب تخلف!

- لولا ان سليم حبها وكان بيهرب منها مكنش غلط وخلف!

مشاكلها خلتها تتعب تاني وتواجة الدنيا تاني فتقوي فبالتلي هتعرف تقوي اللي حواليا ..!

اه احنا ضعفاء جداً، أيوه بنحب الدنيا تبقي سهله، ومل حاجة تمشي زي ما احنا عاوزين ..!
بنزعل أوي لما نواجة مشكلة أو نتعب، لو حد زعلنا، لو حد رفضلنا طلب بنحس ان الدنيا وقفت ع الزعل ومش هتعدي، أو وقفت ع الحاجة اللي عاوزينها ..!

ربنا فعلاً بيبب الأسباب ، من فترة شوفت فيديو لمصطفي حسني بيتكلم عن نفس الفكرة ... وازاي حياته مشيت بسبب تعب عنده أو شوية المشاكل اللي واجهتة ..!
بنسمع الكلام ده وبنقول خلاص واننا اقتنعنا واننا مش هنزعل علي حاجة تاني .. شوية وبننسي وبنرجع نتزمر ونكتئب ونعتزل الدنيا والناس !

اه الدنيا حساها جاية عليا، بس في اللحظة دي ولحظات مرت ولحظات جاية .. أنا ظني وايماني بربنا كبير وانه هيرضيني ويعوضني عن كل حاجة .. بحلم وبتمني وأحلامي كل يوم بتكبر وطمعي في ربنا وكرمة بيزيد .. بس هنا مش هعتبر نفسي طماعة .. لأني طمعانه فيه هو سبحانه وتعالي ❤️❣️



من حوالي أسبوعين اتفرجت علي الفيلم ده ..
اد ايه الفيلم يستحق اني أرشحة لناس كتير أعرفهم، سواء في حياتي حالياً أو كانوا فيها .!

 في الفيلم المعالج النفسي بيقول للبطلة إن حياتنا والناس اللي فيها عبارة عن دواير .. دايره كبيرة وبعيدة وبعدين أقرب وعدد أقل .. لحد ما بيبقي في ٥ هم أقرب الناس لينا، في مكان واحد قابل للتغيير، في الغالب ده بيبقي الشخص المرتبطين بيه!
الحقيقة أنا سألت نفسي نفس السؤال، بس ملقتش إجابة لل ٥ تقريبا فاضيين أو خليني أقول ٣ منهم فاضيين!
قعدت أفكر مع نفسي وأعصر دماغي عن مين ممكن يكون من ال ٣ دول، فعلاً ملقتش.
الناس بقت بتبعد عن بعضها بطريقة بشعة، ومبقاش في علاقات مستمرة، كل العلاقات بقت مؤقتة وفي الغالب العلاقة أصلاً بتبقي لسبب مش حب للشخص أو حب إن تكون العلاقة وطيدة!

أنا بجد زهقت من العلاقات المؤقتة!

واحنا لسه في الكلية كانوا اصحابي بيروحوا يصلوا في الجامع وصلاة العيد ولما كانوا يقولولي أروح معاهم مكنتش بوافق، لأسباب كتير زي اني مبحبش الزحمة، مبحبش قاعدة الستات وأهم سبب هو انه بيبقي تجمع نميمة في حق الكل والستات الكبار بيقعدوا يبصوا علي البنات ومين تنفع لولي العهد بتاعها!

من ٣ سنين بعد أزمة نفسية عنيفة، بدأت أروح مع ماما - طبعاً أصحابي اتجوزوا وخلفوا من زمان 🙂 - كان لبسي العادي واللي اقل من العادي كمان واللي اصحابي وحتي زمايلي في الكلية كانوا بيخيلوا عليه ومش بيعجبهم اكمنه واسع شويتين، مبهدل جايز، مبهتمش بلون الطرحة ماشي ولا لأ !
كانت ماما تسمع الناس وهي بتتأمز - كل يوم هتيجي لابسه حاجة شكل، ودي مش عارف ايه - 😕

السنه اللي فاتت خليت أغلب اللبس بتاعي عبايات وأنا رايحة، السنادي بقي قللت في ده كمان وفضلت لابسه عباية واحدة اسبوع كامل ..!
الأسبوع اللي فات واحدة ندهت عليا، أول مره تكلمني في اليوم ده كنت لابسه جيبه وبلوزه وكنت محرجة وحاسه ان البلوزه ضيقة شويه رغم اني كنت مطولة الطرحة، لاقيت الست دي بتقولي معدتيش تلبسي عبايات، أنا استغربت قولتلها بحسبك هتقوليلي معتيش تلبسي اللي انتِ لابساه ده .. قالتلي لأ معدتيش تلبسي عبايات، مكبراكي، بقالي ٣ سنين بشوفك في الجامع بتلبسي نفس العبايات، عاوزه تلبسي عبايات البسي بس - أنا اللي قاطعتها وقولت بس تكون مدندشة - أنا والست بتتكلم فهمت هي بتلمح لايه طول الكلام بضحك وكان ردي عليها انه مش سبب وان هو نصيب في الأول وفي الأخر.
قالتلي ان عندها بنت وكانت بتلبسها عبايات الأول - بس طبعاً لما بطلت تلبس عبايات بنتها إتجوزت 😅 - 

الفكرة بقي في التريقة اللي الشباب عاملينها بقالهم فترة علي البنات اللي بتروح الجامع متزوقة وحاطه ميكياج، طب ما دي اللي بتعجبكم أهو بتتريقوا ليه بقي، هو الشعب ده عنده انفصام في الشخصية ولا ايه نفسي أفهم ؟!
أنا من يوميها مروحتش الجامع، أنا بروح الجامع عشان أصلي مش عشان أشقط عريس أياً كان أنا لبسي وفي أي مكان مش الجامع بس!

هل فعلا المثل حقيقي في كل اللي بيعجبك وإلبس اللي يعجب الناس ؟!
طب هي الناس شغله نفسها ببعض ليه ؟!
طب هم الشباب عاوزين ايه البنت الحلوه ولا المحترمه ولا كله في باكيدج واحد؟!
طب ولو كله في باكيدج واحد؟ أنتوا أصلاً فيكوا ايه بتتأمروا عشانه ؟!

اللهم أخرجنا من هذه القرية الظالم أهلها.



Get widget