فى ناس أولى ...!

Posted by Marwa Fahmy | 7:33 PM | | 20 comments »


السلام عليكم smile

الحقيقه جايز فى ناس تتضايق من البوست ده .. بس أنا مقتنعه برأيى , والأختلاف ف الرأى لا يفسد للود قضية mrgreen

الأسبوع اللى فات كنت بتفرج على التليفزيون على قناة دبى , كان فى برنامج كده بحب ساعات أتفرج عليه حتى معرفش اسمه biggrin ,
المهم فى أخر البرنامج اتكلموا على مجاعات افريقيا ... بجد الصور اللى جابوها مرعبه بجد cry ,
دى مش أول مره أشوف صور زى دى .. بس كل مره بتأثر بنفس الدرجه ,
و زى كل الناس احنا بنشوف الحاجه نتأثر فى ساعتها وبعدها بشويه ولا كأن حاجه حصلت .. بس هل معنى كده ان احنا المفروض نفضل زعلانين على الناس ومنستمتع بحياتنا .. لأ طبعا .. ده حتى ربنا سبحانه وتعالى بيقول "انى أحب أن أرى أثر نعمتى على عبدى " .
بس المفروض مانفرطش فى النعمه زى العزومات الجامده اللى بنسمع عنها دى وبيترمى كميات مهوله من الأكل والشرب بجد
حر اااااااااااااااااااااااااااااااااااااااااااام
::(

بس المفروض ان احنا برده نحاول نعمل حاجه .. زى ايه بقى هو ده المهم !

لما حصلت مشكله غزه كل الناس هاجت وجمعوا تبرعات بملايين الجنيهات وكل ده رايح على غزه لوحدها .. طيب بيتيألى غزه شبعت من ده وفى ناس أولى بالألوفات مش بالملايين دى كلها .
عاوزين بجد نعمل للناس دى حاجه جامده جده زى غزه .. حد يكون فاهم بجد وواصل يعنى يعرف ازاى نوصل للناس دى .

ولا انتوا ايه رأيكوا questionء

20 comments

  1. موناليزا // February 10, 2009 at 8:19 PM  

    طبعا معاكى حق ومش هناك وبس ده فى مصر كمان حالات اصعب من كده

  2. Butterfly // February 10, 2009 at 9:40 PM  

    أيوه أنا قصدى على كل الأماكن اللى فيها مجاعات
    كل بلد يبقى فيها ناس تهتم ب اللى فى بلادهم ..!

  3. mohamed ghalia // February 10, 2009 at 10:28 PM  

    عندك حق لازم نحاول نعمل حاجة
    الناس دى محتاجة لقمة فى حين بعض الأثرياء بيرموا الأكل
    دمتى بكل الود

  4. شهد الحب»-(¯`v´¯)-»* // February 10, 2009 at 11:42 PM  

    موضوعك مهم جدا
    لان فى ناس بتهدر فلوس كتير فى حاجات ملهاش لزمة الاولى انهم يحسوا بالناس المحرومة ده حتى ربنا سبحانه وتعالى امرنا بصيام شهر رمضان عشان نحس بيهم لكن لا حياه لمن تنادى
    وكمان فى يوم اليتيم المفروض الناس تساعد اليتيم طول السنة لكن معظم الناس ميفتكروش غير فى اليوم دة والمعظم عشان الدعاية والمنظرة مع ان عمل الخير ميكمل بالمنظرة

  5. Butterfly // February 11, 2009 at 12:23 AM  

    @ mohamed ghalia
    ياريت لو عندك اقتراح قوله :)

    @ شهد الحب»-(¯`v´¯)-»*
    فعلا بس برده كل واحد وضميره ونيته

    ps : نورتى المدونه :)

  6. الازهرى // February 11, 2009 at 1:14 AM  

    يقول الله تعالى "وكلوا واشربوا ولا تسرفوا انه لا يحب المسرفين"
    الموضوع اتفق معك فيه
    واظن ان الجهة التى تملك الاجابة هى الهلال الاحمر حيث انها تشارك فى تلك الامور
    ورما لدى عودتى الى القاهرة اسأل وابلغك بالاجابة

    اما بالنسبة لداخل مصر فهناك الكثير من الجمعيات التى لها نشاط واسع فى مساعدة الفقراء وغير القادرين مثل الجمعية الشرعية وجمعية الاورمان

  7. نهــــــــــار // February 11, 2009 at 2:47 AM  

    السلام عليكم فراشتي ...
    يجوز أنتي للمره الأولى تسمعين بها بس نحن في الإمارت عندنا جمع التبرعات من وعيت بهذه الدنيا
    ليس لأفريقيا وغزه بل للعالم..
    وبإداره من جهات حكوميه وغير حكوميه..
    ....
    وفقكم الله
    ..
    دمتي بخير

  8. ضد التيار // February 11, 2009 at 1:57 PM  

    طبعا اتفق معاك

    بخصوص داخل مصر فى جمعيات كتير مهتمه فعلا بالفقراء

    بس المشكله بقى سواء داخل او خارج

    للأسف الشديد لان بعض الجمعيات مابتوصلش التبرعات لامكانها

    الناس بقت تاخدها حجه و يمتنعه عن التبرع و يقولوا اصلها مابتوصلش

  9. L0vElYGh0sT14 // February 11, 2009 at 7:31 PM  

    الناس دي علشان تساعديها تنزليلهم في مقرهم والمكان الي بيعيشوا فيها ويكون جاي وراكي عربيات فيها اكل وحاجات كتيرة تساعديهم بيهم , انما لو بعتيهم لمؤسسات خيرية مش هيستفيدوا منهم زي ما انتي تنزلي بنفسك وتثبتي الثواب الكبير دة بنفسك ومنها بتكسبي مغامرة وبتكسبي ثواب ربنا
    تحياتي على هذا البوست الرائع والله يوفقك

  10. Butterfly // February 11, 2009 at 10:53 PM  

    @ الازهرى

    طبعا انت عندك حق بس زى ما معظم الناس قالت
    ان المؤسسات والجمعيات غالبا مش بتعرف توصل للناس اللى محتاجه فعلا .
    احنا بس محتاجين نبقى متقنين أكثر .

    @ نهــــــــــار
    لأ أنا مش أول مره أسمع بالموضوع بس زى ماقولت معظم المنظمات دى مش مضمونه ..!

    @ ضد التيار
    نفس رأيى ;)

    @ L0vElYGh0sT14
    أيوه فعلا انت عندك حق
    وأنا نفسى ظروفى وامكانياتى يسمحوا بده
    مش هتردد أبدا ساعتها
    وشرفت المدونه :)

  11. رابطة هويتي اسلامية // February 12, 2009 at 11:05 AM  

    الحجاب حقيقة ثابتة أم مجال للتفكير

    من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
    ومن هنا تبنت الرابطة أن تكون هي حجة علي من يدور بينهم النقاش علي صفحاتها.
    نفجر الجديد دائما حوارنا اليوم
    الحجاب حقيقة ثابتة أم مجال للتفكير
    وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
    ندعوكم للمشاركة في هذا الحوار المفيد
    تقبلوا دعوتنا ننتظركم لنستفاد منكم
    رابطة هويتي إسلامية

  12. القلم السكندري // February 12, 2009 at 5:25 PM  

    السلام عليكم

    أتفق معكِ في ان هناك الكثير من الدول بحاجة إلي مجهود مكثف من التبرعات وأن غزة ليست الوحيدة.. بل وأزيدك من الشعر بيتين:: أنه حتي علي مستوي الجبهات الجهادية هناك المزيد من الدول لا تجد لها حتي مساحة إعلامية تبعثُ صرخاتها المكبوتة وأناتها المكتومة إلي آذان الآدميين كالشيشان مثلا وأفغانستان والصومال وغيرهما

    بل وحتي الدول التي تلفعت بالفقر المدقع والتي ترتع فيها المؤسسات التنصيرية وكان أولي بالمسلمين أن يكون مالهم ومدهم ودعوتهم إليها أقربُ من يد الصليب

    ولكن نقطة الخلاف أن غزة لم تشبع من هذه الملايين المتصورة

    غزة بلد يحتاج إلي إعادة إعمار من جديد

    غزة .. آلاف الجراح الممدة علي أسرة المستشفيات- إن وجدتها- وكم تحتاج من التجهيزات الطبية والأدوية

    غزة.. ملايين الأفواه التي جوعها الحصار ودقّ بطونها .. تحتاج مثلنا للقمة العيش وإلا فهي في طريقها إلي الصور التي تأتينا من جنوب إفريقيا

    إن لجنات مجلس مدينة رفح تتحدث اليوم في 180 منزل متهدم جزئيا أو كليا في رفح المصرية.. فما بالنا بمن كانوا تحت النار

    ..

    نعم قائمة الواجبات مكدسة

    ولكن هناك أولويات.. ولا زالت غزة تحتاج المزيد

    تقبلي وافر التحية

  13. Butterfly // February 12, 2009 at 8:46 PM  

    @ القلم السكندري

    أيوه طبعا انت معاك حق ..
    بس فعلا انا بسمع كميه أرقام كبيره جدا اتجمعت لغزه .ز أنا مش معترضه ولا حاجه ..
    بس اذا كانت فعلا الكميه كبيره ليه متتوزعش على باقى الناس اللى محتاجه !!

    وشكرا ...

  14. Rania // February 13, 2009 at 9:29 PM  

    موضوعك جميل فعلا ا سكر
    و يا ريت نعمل حاجاة بجد للعالم دى

    تحياتى

  15. Butterfly // February 13, 2009 at 10:55 PM  

    شكرا رانيا
    شرفتينى :)

  16. Habiba // February 14, 2009 at 7:40 PM  

    ازيك يافراشتى

    مش عارفه مين اللى ممكن يختلف معاكى؟
    كلامك انا متفقه معاكى فيه جدا

    بس المشكله بجد ان انفعالاتنا اخرها الوقت اللى هنقول فيه ياعينى وياحول الله وندمع دمعتين على اسوأ الفروض وخلاص

    ربنا يهدينا ويهديلك الاحوال يارب
    اخبار امتحاناتك ايه صحيح؟

  17. Butterfly // February 14, 2009 at 8:19 PM  

    @ Habiba

    ازيك انتى عامله ايه
    أنا الحمد لله كويسه
    ربنا يستر فى النتيجه :(

    وطبعا انا عارفه ان أخرنا كده بس عاوزين نتقدم بقى عن كده ويبقى لينا فعل ملموس فى المجتمع :)

  18. كريم عبد المجيد // February 14, 2009 at 8:48 PM  

    موافقك في كلامك , بس الي بيهتم بموضوع المجاعات الأفريقيه في مصر علي حد علمي قليل جداً , وحتي لو تواجد كم من الناس فبرضوا يعتبروا قليلين مقارنة بغيرها من القضايا .
    انا مع ان احنا نتبرع ليهم بردوا, لانهم بني ادمين بس فين الجهه
    دي الي توصلهم فعلاً التبرعات ؟

  19. Butterfly // February 14, 2009 at 9:29 PM  

    @ كريم عبد المجيد
    أيوه عندك حق
    ماهوا ده اللى أقصده عايزين ناس نثق فيهم !

  20. Anonymous // February 19, 2009 at 12:13 AM  

    السلام عليكم
    اولا موضوعك كتير مهم بالذات فى وقتنا ده
    لان المشكلة دى انتشرت بصورة كبيرة جدا يمكن مبقاش ليها حل لان زى ما البعض قالو ان الاغنياء خلاص مبقوش يحسو بالفقراء وزى مابيقولو ا فى الامثال مبيحس بالنار الا الى ماسكها
    واظن محدش بيمسك النار دى غير الفقراء
    يبقى لو فكرنا فى حل اولى ان الناس كلها تنزل للمستوى ده تشوف الناس دى بتعيش ازاى بتنام ازاى بتاكل ايه
    مش من خلا وسائل الاعلام لا لازم ننزل ليهم فى حياتهم واظن انهم ما اكثرهم فى كل البلاد
    بعد كدا لما نقدر نفهم احتياجتهم ممكن فى الوقت ده نقدر نجمع تبرعات نشوف طرق المساعدة المختلفة
    مظنش ان الموضوع هيكون سهل الموضوع محتاج اصرار وعزيمة وحب الخير
    هنتعب شوية فى الاول لكن بعد كدا هنشوف اننا ساعدنا ناس كتير
    الى اقدر اقوله فى الاخر اننا سعيد جدا بوجودى معاكم فى المدونة الجميلة دى وسعيد اكتر ان صاحبة المدونة بنت وان فى بنت بتفكر بعقلانية كدا بالمواضيع الجميلة دى
    وبالتوفيق ان شاء الله

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget