لسه مخلصه الكتاب من شويه
طبعا مش محتاجه أقول ولا كلمه عن صلاح جاهين
ببساطته فى التعبير و... و ...

أنا هكتبلكوا أكتر الرباعيات اللى عجبتنى



مـع إن كل الخلق من أصــل طين
وكلهم بينزلوا مغمضـــــــين
بعد الدقايق والشهور والسنين
تلاقى ناس أشــرار وناس طيبين
عجبى !!


خرج ابن أدم م العدم قلت : ياه
رجع ابن أدم للعــدم قلت : ياه
تراب بيحيا .. وحى بيصـير تراب
الأصـل هـو المـوت والا الحيـاة ؟
عجبى !!


قالوا الشقيق بيمص دم الشقيق
والناس مـاهياش ناس بحق وحقيق
قلـبى رمـيته وجـبـت غـيره حجر
داب الحجر ... ورجعت قلبى رقيق
عجبى !!


يوم قلت آه .. سمعونى قالوا فسد
ده كان جدع قلبه حديد وانحســد
رديت على الايمين أنا وقلت .. آه
لو تعـرفـوا معـنى زئــير الأسـد
عجبى !!


أنا كنت شئ وصـبـحـت شئ ثم شئ
شوف ربنا . . قادر على كل شئ
هز الشجر شواشيه ووشوشنى قال :
لابد مايمـوت شئ عشـان يحيـا شئ
عجبى !!


فتحـت شبـاكى لشـمس الصبـاح
ما دخلش منه غير عويل الرياح
وفتحـت قلبى عشان أبوح بالألم
ماخرجـش منه غير محـبه وسمـاح
عجبى !!


يأسك وصبـرك بين إيدك وانت حـر
تيـأس ماتيـأس الحيـاه راح تمـر
أنا دقت مندا ومندا عجبى لقيـت
الصـبـر مـر وبردك اليـأس مـر
عجبى !!


حاسب من الأحزان وحاسب لهـا
حاسب على رقابيك من حبلها
راح تنتهى ولابد راح تنتهى
مش أنتهت أحزان من قبلها؟
عجبى !!


أنــا اللـى بالأمر المحـال اغـتـوى
شـفـت القمر نطـيـت لفـوق فى الهـوا
طلتـه ماطلتـوش إيـه أنــا يهمــنى
وليه ... مادام بالنشوة قلبى ارتوى
عجبى !!



17 comments

  1. romansy // June 3, 2009 at 12:37 PM  

    الله
    على صلاح جاهين وسيد مكاوى
    فين العصر دا
    العصر اللى كان فيه حب
    واخلاص

  2. romansy // June 3, 2009 at 12:45 PM  

    قبة سيدنا الوالي دي نوروها

    محلا البيارق و الناس بيزوروها

    قبة سيدنا الوالي في الجو عالية
    محلا البيارق لما نوروها
    حمص حمص دا اللي ماينقص
    عمار يرقص يرقص و يقول
    اللي شاف حمص و الا كلشي
    حب و اتلوع و لا طالشي
    بسترك هات حبة بقرش
    حمص حمص حمص
    إسعى إسعى إسعى إسعى
    خدلك صورة ستة في تسعة
    إسعى إسعى إسعى إسعى
    ياسي عجورة النار خسعة
    الله الله الله الله
    عجمية باللوز طعمية أراجوز
    اليلة الكبيرة يا عمي و العالم كتيرة
    ماليين الشوادر يابا في الريف و البنادر
    دول فلاحين و دول صعايدة
    دول من القنال و دول رشايدة
    يا حضرة الأراجوز قولي
    نعم يا عمدة عاوز إيه
    منين يروحوا لمتولي
    إمدح نبينا و صلي عليه
    اللهم صلي عليه
    تمشي كدة على طول على طول
    لحد ما تلاقي عمارة
    تكسر يمين تلقى بتاع فول
    دكانته على ناصية حارة
    تدخل يمينك و شمالك
    شارعين و في التالت تكسر
    شارعين و في التالت أكسر
    على اليمين واخد بالك
    و تمشي على طول تتمخطر
    و أمشي على طول و أتمختر
    تفضل كدة تمشي و تلف
    و تخش من مطرح ما طلعت
    و أخش من مطرح ما طلعت
    و لما تلقى مقلة لب
    تعرف بإنك توهت و ضعت
    دي وصفة سهلة قوي قوي
    دي وصفة هايلة قوي قوي
    مع السلامة يابو عمة مايلة
    فتح عينك تاكل ملبن
    فينك فينك تاكل ملبن
    إوعى لجيبك لا العيب عيبك
    قرب جرب نشن وسطن إيدك و سطن
    إضـــــــــرب
    يحميك يا بني تبقى غالبني
    قرب خدلك حتة ملبن
    فريرة للعيل يابو العيال ميل
    خدلك سبع فرافير
    زمارة شخليلة عصفورة يا حليلة
    طراطير يا واد طراطير
    طراطير طراطير طراطير
    الليلة الليلة السيرك تعالوا
    دي فرجة تساوي جنيه قولوا هيه
    بمناسبة هذا المولد يا ولاد
    برنامج سواريه قولوا هيه
    في السيرك شجيع يهجم عالسبع
    و يركب دوغري عليه قولوا هيه
    و بنات قمرات زي الشربات
    حلوين مش عارف ليه قولوا هيه
    و كمان بلياتشو تعالوا إسمعوا ناتشه
    و شوفوا هيعمل إيه قولوا هيه
    هيـــه هيـــه هيـــه
    أنا شجيع السيما أبو شنب بريمة
    أول ما أقول عليهوب و أصرخلي صرخة
    السبع يتكهرب و يبقى فرخة
    حالاً بالاً سأصارع أسد إنما إيه متوحش
    و هخلي وجهه شوارع تسقيفة يا ناس ميصحش
    أهو جه أهو جه تسقيفة بقا
    تسقيفة أمال تشجيعة أمال
    تعالالي الالي اللالي يا حبيبي تعالالي
    السمك مقلي كل و برقلي صنف زي الفل
    استخار و إختار فشة أو ممبار
    يالا سمي و كل
    يام المطاهر رش الملح سبع مرات
    بمقامه الطاهر خشي و قيدي سبع شمعات
    يا عريس يا صغير
    علقة تفوت و لا حد يموت
    لابس و مغير و هتشرب مرقة كتكوت
    بالزمة دة سابع عيل مزفوف من وقت قليل
    مولد شالله يا معلم عقبال أولادك كلم
    واحد مظبوط و إتنين مصري
    عمك حاضر جايلك دوغري
    مسا التماسي مسا التماسي
    ياورد قاعد على الكراسي
    هات شاي يا دقدق عيني و راسي
    سمعنا يا ريس حنتيرة
    للصبح معاك السهيرة
    سمعنا سمعنا
    يا غزال يا غزال العشق حلال
    دوبتني دوب خلتني خيال
    يا شفتك فص فراولة و أنا لا قوة و لا حول
    دوختلي قلبي على اولة
    أه يا غزال العشق حلال
    يارب يا عالم بالحال
    تهدي حبيبي و يصبح عال
    و أغني و أرجع بالموال و أقول يا غزال
    وقف ياريس حنتيرة في ناس هنا قاعدة كتيرة
    ولا حد قال هات تعميرة و لا واحد شاي
    أه اللي هيطلب راح يقعد
    و اللي ما يطلبش يبعد
    يالابنا نخرج يا مسعد شالاع التورماي
    ورينا القوة يا بني إنت وهو
    مين عنده مروى و عاملي فتوة
    يقدر بقدارة على زق التارة و يفرقع بمبة
    وسع أنا أزق التارة و أضرب ميت بمبة
    دانا الاسطى عمارة من درب شكمبة
    سيطي من القلعة لسويقة اللالة أنا واخد السمعة
    طب يالا تعالى لاياعم سعيدة هأأو دي البدلة جديدة
    هأأأه سعيدة يابو بدلة جديدة
    إوعد يارب إوعد أدي كمان قهوة
    يالابنا يا مسعد ندخل على سهوة
    طار في الهوا شاشي و إنت متدراشي
    طارفه شاورلي شاورلي عليك
    حكم الهوى ماشي
    هوا العصاري على سطح جاري
    خدني و رماني عليك و لا إنت داري
    أهين يا ناري منك يا جاري
    خدني ورماني رماني عليك هوا العصاري
    طار في الهوا شاشي و إنت متدراشي
    طارفه شاورلي شاورلي عليك
    ماشي ماشي ماشي كلامك
    اللي هيطلب راح يقعد و اللي مايطلبش يبعد
    يالابنا نخرج يا مسعد شارع التورماي
    ناس من بلدنا هناك أهم
    روح يا إبراهيم إندهلهم
    سلامات عالبلديات
    ليلتكوا أنس و جلجلة إنشد و لعلع يا ولا
    شفت في منام صاحب المقام دة أوبهة
    و يمامة حايمة عليه بتسبح ربها
    ميلت فوق يده وجيت أحبـــــها
    صحوني من النوم خدت بعضي
    وتني جاي و بعودة حـــي
    ياولاد الحلال بنت تايهة طول كدة
    رجلها الشمال فيها خلال زي دة
    زحمة يا ولداه كام عيل تاه؟؟
    اليلة الكبيرة يا عمي و العالم كتيرة
    ماليين الشوادر يابا في الريف و البنادر

  3. كيــــــــــــارا // June 3, 2009 at 4:33 PM  

    الله شخصيه بعشقها

    يأسك وصبـرك بين إيدك وانت حـر
    تيـأس ماتيـأس الحيـاه راح تمـر
    أنا دقت مندا ومندا عجبى لقيـت
    الصـبـر مـر وبردك اليـأس مـر
    عجبى !!

    رباعيات كلها جميله ياقمر

  4. ومازلتُ أتعلم // June 3, 2009 at 6:37 PM  

    صلاح جاهين رائع جداً
    ورباعياته اللى اختارتيها جميلة
    تقبلى مرورى حبيبتى

  5. Butterfly // June 3, 2009 at 7:28 PM  

    @ romansy
    فعلا كان زمن جميل


    @ كيــــــــــــارا
    هو شخصيه لذيذه جدا بصراحه


    @ ومازلتُ أتعلم
    أهلا بيكى نورتى المدونه

  6. موناليزا // June 3, 2009 at 9:50 PM  

    ذوقك جميل:)
    ومبروك على النيو لوك:)

  7. Butterfly // June 3, 2009 at 11:29 PM  

    @ موناليزا
    شكرا ربنا يخليكى
    ده من ذوقك :)

  8. الازهرى // June 3, 2009 at 11:54 PM  

    من اجمل الرباعيات اللى بحبها لصلاح جاهين


    الشارع دا كنا ساكنين فيه زمان
    كل يوم يضيق زيادة عن ما كان
    اصبح الآن بعد ما كبرنا عليه
    زي بطن الأم مالناش فيه مكان

    بجد بتفكرنى بحاجات كتيييييييير

  9. Butterfly // June 4, 2009 at 2:10 PM  

    @ الازهرى
    فعلا حلو أوى ...

  10. blue-wave // June 4, 2009 at 3:58 PM  

    احساسك واختياراتك تحفه جدا
    تسلمى

  11. Butterfly // June 4, 2009 at 8:21 PM  

    @ blue-wave
    شكرا
    ده بس من ذوقك :)

  12. نهــــــــــار // June 6, 2009 at 4:55 PM  

    السلام عليكم...
    إزيك يا فراشتي....
    .....
    إختيار موفق...
    وبالفعل أعجب مخلوقات الله الإنسان....
    ..........
    فراشتي إنتي غيرتي التيمبليت...
    ....
    دمتِ بخير

  13. Butterfly // June 6, 2009 at 6:27 PM  

    @ نهــــــــــار

    أهلا انتى فين من زمان :)
    فعلا الانسان ده عجيب جدا

    وانا غيرت ال
    Template
    فعلا
    :)

  14. عمرو وجيه // June 11, 2009 at 2:22 PM  

    و عجبي

    بجد تحفة


    أكيد مش جاهين

    شكرا للنقل

  15. Butterfly // June 12, 2009 at 2:16 PM  

    @ عمرو وجيه
    أهلا بيك
    شرفت المدونه :)

  16. لاسع افندى // June 13, 2009 at 2:49 AM  

    انا من عشاق صلاح جاهين وبحب الرباعيات جدا


    تحياتى

  17. Butterfly // June 14, 2009 at 8:46 PM  

    @ لاسع افندى
    أهلا بيك
    بيتهيألى مفيش حد مبيحبش صلاح جاهين :)

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget