بقالى فتره كبيره بفكر فى حاجات كتير
منها السلبى ومنها الايجابى ..!

هقول بس اللى فى بالى دلوقتى والباقى كله فى وقته ..!

.....................................

لسه جايه من حنة واحده صاحبتى , والناس كلها فرحانه وبيسقفوا والحاجات دى وأنا معاهم طبعا ,
ما انا لازم أواكب العصر senyum

المهم حاجات خطرت على بالى وأنا قاعده وهى خطرت على بالى قبل كده الصراحه ..

منها افتكرت صاحبتى غاده اللى ماتت , وقلت اهو كلنا عمالين نهيص ومش فاكرينها أو بمعنا أصح نسيناها
وده حال الدنيا مش هنفضل نفكر فى اللى فات ومنعش اللحظه زى ما بيقولوا ..
بجد مش عارفه أنا ليه بقيت مش قادره أنسى حاجه وبفتكرها فى أوقات ممكن تخلينى مستمتعش باللحظه اللى أنا فيها ..!

--------

كمان صاحبتى دى ما شاء الله عندها اخواتها وزوجات اخوانها senyum,
كنت لما اتصل بيها أسألها مش عايزه حاجه ولا أى مساعده تقولى دى كذا وكذا موجودين وبيعملوا كل حاجه.
افتكرت بقى ان شاء ربنا وجه عليا الدور مين اللى هيبقى معايا ,
لا أخ ولا أخت ولا حتى قرايب يفتحوا النفس ,
حتى اصحابى المقربين 2
واحده اتجوزت وخلفت ماشاء الله بنت وولد توأم
ومحتاسه بيهم يا عينى ومش بتعرف تتحرك وتخرج كتير عشانهم .

والتانيه اهى بتتجوز أهه وطبعا برده انسى انها ممكن تبقى تجيلى
أو حتى تفتكرنى بعد كده غير كل حين ومين زى ما بيقولوا .!

هل ياترى ممكن ألاقى حد جنبى فى أى وقت كان ,
انا عارفه انى دايما بقول الكلام ده ,
أيوه أنا أعرف ناس كتير بس مش حاسه ا فى حد قريب منى !
أو بمعنى أصح معتش بحس بحاجه around

بجد زعلانه أوى على قد متعودت على الوحده على قد ما زهقت putuscinte ء


14 comments

  1. موناليزا // July 8, 2009 at 2:55 AM  

    البوست مش باين:(

  2. Sweet Violet // July 8, 2009 at 8:08 AM  

    حاولى تغيرى من روتين الحياة ياتوتا
    علشان حالة الملل دى تروح
    وان شاء الله هتشوفى الحياة بمنظور تانى
    لكن بجد
    حاولى تعملى حاجة جديدة

  3. Butterfly // July 8, 2009 at 12:39 PM  

    @ موناليزا
    مش باين ازاى !!
    وبعدين أنا عاوزه أشوفك :)

    @ Sweet Violet
    أنا فعلا بعمل حاجات كتير جديده
    وبحبها بس برده مش حاسه انى مبسوطه :(

  4. الازهرى // July 8, 2009 at 1:57 PM  

    وتفكرى ليه اساسا
    التفكير اكتر حاجة ممكن تتعب

    حاولى تاخدى اجازة كاملة من غير اى مشاغل اطلاقا ةبعدها هتلاقى نفسك جديدة تماما

  5. Butterfly // July 8, 2009 at 7:02 PM  

    @ الازهرى
    أهو هو ده بالظبط اللى أنا نفسى أعمله
    بس ليس كل ما يتمنى المرء يدركه :(

  6. كيــــــــــــارا // July 10, 2009 at 9:00 PM  

    تعرفي كنت بفكر زيك كدا خاصة مليش اخت تقف جنبي وقرايبي انا الكبيرة يعني بس ربنا رزقني باللي اقرب من الاخت

    ورزقني اصدقاء مالين الدنيا عليا

    انتي محتاجه تخرجي من الشرنقة دي عشان تشوفي الدنيا بجمالها

  7. Mada // July 10, 2009 at 9:16 PM  

    ومن امتي الوحدة كانت حلوة حاولي تندمجي وسط الناس اكتر

  8. Butterfly // July 10, 2009 at 10:45 PM  

    @ كيــــــــــــارا
    حلوه شرنقه دى :)
    أوعدك انى هحاول ...

    @ Mada
    لأ أحيانا الوحده بتبقى حلوه جدا وفى ناس بتحتاجلها كمان
    بس مش المفروض انها تبقى على طوول .

  9. Meme // July 13, 2009 at 3:46 AM  

    فعلا البوست مش طاهر حاولي تصلحيه يا فراشه

  10. Butterfly // July 13, 2009 at 12:31 PM  

    خلاص صلحتوا :)

  11. ديالا // July 14, 2009 at 1:50 AM  

    مروه

    يمكن انا اول مره ازور مدونتك

    بس هقولك حاجه يمكن غريبه او تستغربيها

    ممكن انا اقف جمبك لما ربنا يرزقك بالانسان الي تستاهليه

    لو وافقتي
    عرفيني

    لانا كلنا اخوات فعلا ودينا واحد وبلدنا واحده فيمنغعش تحسي كده وانتي وسطنا

    ربنا يكرمك يارب

  12. Butterfly // July 14, 2009 at 10:08 PM  

    @ ديالا
    ربنا يخليكى
    ده شئ يشرفنى جدا كمان
    وتنورينى
    ومجرد دخولك وكلامك ده شرف ليا

  13. mohamed ghalia // July 16, 2009 at 11:21 PM  

    معاكى حق الى بيموت بيتنسى
    ربنا يكرمك وـكيد هتلاقى ناس جنبك كتير
    وأحنا ياستى أهو جنبك
    ربنا يسعدك دايما

  14. Butterfly // July 17, 2009 at 12:05 AM  

    @ mohamed ghalia

    شكرا على ردك واهتمامك :)

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget