دايما دموع !!!

Posted by Marwa Fahmy | 10:20 PM | | 7 comments »


النهارده بعد ما خلصت الكورس وكنت أصلا نايمه وخارجه فى وقت زحمه جدا,
فقلت أروح الكليه أصلى الظهر على ما الزحمه تخف شويه !!

بعد ما دخلت الجامعه لقيت واحده زميلتى ماشوفتهاش من زمان أوى قاعده فى ظل عربيه !
سلامات بقى عامله ايه وجايه منين وراحه فين والكلام ده !

المهم أنا حسيت من طريقة كلامها انها مش طبيعيه , زى مايكون شايله هموم الدنيا فوق دماغها!
مالك يابتى انتى مكونتيش كده , دانتى كنتى مبتسمه وبتضحكى على طوول !

كان أسلوبها غريب فى الكلام , انا مرتدش أسيبها غير لما أعرف مالها بالرغم انها مكنتش راضيه تتكلم وكل شويه تقولى امشى ومفيش حاجه وتتوه فى الكلام !

أنا مردتش أسيبها طبعا لحد ما فضفضت شويه كده وقعدت تقولى كلام كده ,
نعتبر عارفينه وواخدين عليه ..!
ان الناس مش سايبنها فى حالها وعمالين يقروا عليها , عشان هى بتستغل يعنى وكده
وكمان عرفت انها كانت اتخطبت واتكتب كتابها كمان بس محصلش نصيب
وان هى أصلا مكنتش موافقه بس أهلها اللى كانوا غاصبين عليها..
والناس مستغربه ان يحصلها كل ده ولسه ماشيه على رجليها..
طبعا كل ده مع بكاء كان بتحاول تداريه من الأول !!

أنا حاولت على قد ما أقدر أخفف عنها وأخرجها من اللى هى فيه ,
مش عارفه اذا كنت عملت اللى عليا وألا كان المفروض أعمل حاجه تانيه .

لأ وبعد لما سبتها تروح شغلها ومشيت ومروحه ركبت ميكروباص يشغلى
دايما دموع دموع دموع
دايما يا قلبى طريقنا شوق
من فين تلاقى الناس خانوك
دايما ألم دايما عذاب دايما جراح
لكن الفرح ممنوع ممنوووع !!!

أصل هى كانت ناقصاه !!


هى الناس جرالها ايه ,
حشرين نفسهم فى كل حاجه ليه ,
ليه مش بيتمنوا الخير والسعاده لبعض,
والدنيا كده تبقى جميله وصافيه وهاديه ؟؟!!!!ء

7 comments

  1. Sweet Violet // August 13, 2009 at 11:33 PM  

    ما هو لو الناس مش عملت كده تمرض
    الناس للأسف بقت تنشغل بحياة غيرها عن حياتها هى
    مش عارفة بجد ليه
    الاول كنا بنقول فراغ لكن اللى الواحد شايفه فى البلد دى يقول ان المفروض ان الواحد مش عنده حتى وقت يغمض عينه من كتر المشاكل اللى بتحصل
    ربنا يهديهم بجد

  2. ديالا // August 14, 2009 at 3:10 AM  

    يابنتي ماهو ده بقي الطبيعي بتاع الناس

    لازم يقرواويحسدوا ويتحشروا في كل حاجه ودي بتشتغل ودي لا ودي اتجوزت ودي لا ودي مبسوطه ودي لا

    مفروض يسيبوا الناس في حالها كل واحد فيه الي مكفيه بامانه

    كل سنه وانتي طيبه

    ورمضان كريم

  3. كيــــــــــــارا // August 14, 2009 at 12:22 PM  

    لو كل واحد شغل نفسه بيه ومش اتحشر في الناس كانت الدنيا اتعدلت بس هيعملو كدا ازاي دا مرض يابنتي كوكاين في دمهم

  4. sweet angel // August 14, 2009 at 6:38 PM  

    السلام عليكم
    . . .. . . ..

    ازاي الناس متتكلمش

    دول كانو يموتو


    لا ولو كانت هي تعبت بعد الموضوع ده ولا حاجه

    كانو بردو هيتكلمو ويوقولو ايه ده هي مالها كده

    ربنا يحفظنا

    وعلى رأيك

    دايما دموع

  5. الازهرى // August 14, 2009 at 8:41 PM  

    تعرفى واحد صاحبى كان بيحكيلى انه ن اسبوع تقريبا راح يسأل عن انسان فى مجلس المدينه

    وعلى البوابه قال عايز فلان سألوه ليه قال عايزه فى حاجه
    فشاوروا له على مبنى
    راح هناك لقى واحد واقف على اول السلم سأله عن فلان فرد ليه ؟
    قاله عايزه فى حاجه فشاور له على الطرقه على اليمين
    دخلها لقى واحد واقف بملفات
    سأله فقاله ليه ؟

    باختصار الموقف اتكرر حوالى سبع مرات فى مسافه لاتتعدى 100 متر

    وفى النهايه لقى اخو الشخص ده وعرف انه غايب

    تحياتى
    وكل سنه وانت وكل احبابك واصحابك بخير وسلام

  6. نهــــــــــار // August 20, 2009 at 12:09 AM  

    السلام عليكم...
    فراشتي ...
    شوفي الناس مش حتسيبك في حالك خالص
    ولو طنشتي ...
    ولو فكرتي ترضيهم فإرضاء الناس غايه لا تدرك ..
    يعني خذي مبدأ كوووولووو بيعدي ..
    ............
    وأولا وأخيرا التوكل على الله ..
    في امان الله

  7. sweet angel // August 20, 2009 at 3:51 PM  

    تاج على مدونتي

    تفضلي عزيزتي لاستلامه

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget