بجد استمتعت بالكتاب من أول كلمه واستفدت منه كتير ,
يمكن انا كنت أعرف ان فى أنواع مختلفه للحب بس مكنتش أعرف انهم كتير أوى كده يعنى النوع الواحد اللى كنت أعرفه طلع بيتفرع منع عشرة أنواع تانيه مثلا .
غير من تفكيرى فى حاجات وزود معلوماتى فى حاجات تانيه وخلانى أتمسك بأشياء كنت أنا أصلا مقرراها بينى وبين نفسى .
ومن الحاجات اللى خرجت بيها من الكتاب - فى منها كنت
عارفاه أو بمعنى أصح فاهماه من حاجات تانيه -

* ان التعليم العالى مش كافى , يعنى مش المفروض الواحد يبهره واحد دكتور مثلا أو مهندس لمجرد الشهاده ممكن يطلع انسان جاهل بكل معنى الكلمه التعليم اللى اتعلمه ده مجرد شهاده معلقها او بيباها بيها .

* انى مبقاش آسيه على نفسى , يعنى لو غلطت اه هزعل وضميرى هيعذبنى , بس مش معنى كده انى أفضل كده على طول لأ ممكن أصلح ده بأنى أبقى أحسن وأستفيد من التجارب اللى قبل كده .

* الحياه مش كلها سعاده ومش كلها كئآبه , فلما ابقى سعيده متوقعش انى هفضل كده على طول ولما أزعل برده يبقى عندى أمل ان بكره اكيد هيبقى أحسن .

* ان كيدهن عظيم , فعلا المرأه لما بتكره وتفقد السيطره على نفسها ومشاعرها ممكن تعمل أى حاجه والساطور والأكياس يشهدوا :) .

* كلام الناس لا بيقدم ولا بيأخر , لأ ممكن يأخر وممكن لو أهتمينا بيه نعمل فى الأخر زى جحا ونشيل الحمار :S .

* أنت المتحكم الوحيد فى حياتك , يعنى انا اللى أقدر أقرر أزعل ولا أفرح , أنا عارفه ان ده صعب وان أكيد فى حاجات بتأثر فينا غصب عننا , بس كمان اراده الانسان لازم تبقى قويه ومش المفروض نخلى أى حد مهما كان انه يتحكم فى حالتها سواء نفرح أو نزعل , ونزعل بالذات .

* ضروره الصراحه مع شريك الحياه مع اختلاف الحالات والمواضيع , يعنى بلاش المظاهر الكدابه اللى بتبقى فى الأول دى , وفى الأخر هما الاثنين بيطدموا ..!

* المرأه طبيعتها النفسيه متقلبه دائما ورغم ذلك فهى أكثر نضجا من الرجل .

* الحب هو الحل الوحيد لأى مشكله .

5 comments

  1. موناليزا // September 25, 2009 at 12:58 AM  

    كتاباته دائماً تبعث بداخلى نوع من الفكر المميز

  2. ومازلتُ أتعلم // September 25, 2009 at 1:22 AM  

    هو الكتا ب حلو جدا على فكرة
    بس فيه عيبين اتنين
    ان انيس منصور كان بيتكلم فى الدين براحته وقال حاجات غلط
    وإنه كان بيرغي شوية
    واسالينى بقى على الراجل الرغاى
    بكره الرجالة الرغاية مووووووووووت
    هههههههه

  3. Butterfly // September 25, 2009 at 1:33 AM  

    اه فعلا دى حاجه انا نسيت أكتبها
    :(

  4. Sweet Violet // September 25, 2009 at 9:41 AM  

    كل اللى ذكرتيه انا فعلا بقوله و خصوصا موضوع التعليم و نضج المرأة
    الا ان فى حاجة واحد من اللى قولتيها بجد بحاول اعملها ومش بعرف هى انى ماكنش قاسية على نفسى دى صعبه عندى
    لانى ضميرى من النوع اللى مش بيعذب تعذيب عادى
    v_v

  5. الازهرى // September 25, 2009 at 12:52 PM  

    انيس منصور هو افضل قارىء فى مصر حسب تصنيف العقاد
    وكتبه فيها معرفه كتير وفلسفه قويه ومبسطه
    بس فيها خلط احيانا
    وفى نقط اختلاف واضحه عنده

    تحياتى دوما

    اما بخصوص ان كيدهن عظيم
    هتلاقى فى ذكريات عندى كتيييييييييييييييير

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget