السلام عليكم

يوم السبت الحمد لله أخيرا بعد رحلت اقناع سنه مع بابا انى أروح معرض الكتاب ..!
التجربه كانت جديده عليا وكنت حباها أوى .. يمكن أكتر كمان عشان انا بحب القاهره اوى ونفسى أعيش هناك, ومروحتهاش من زمان
من الرحله يعنى من سنتين تقريبا !

اشتريت كتب يمكن مش كميه كبيره بس انا كنت قاصده لأنى عارفه انى مش هلحق أخلص كل ده فى الأجازه
وكمان قلت اهو كل مره أبقى أشترى كام واحد على قد احتياجى .
الغريب بقى ان بابا اشترى كتب وصرف اكتر منى biggrin

واللى استغربتله اكتر انى مكنتش حاسه انى مبسوطه زى ما كنت متخيله مش عارفه ليه .. يمكن عشان كنت حاسه انى مقيده بناس !!
ويمكن عشان انا مش بحب الزحمه !
ويمكن لأنى تخيلت لليوم شكل وأحداث كان نفسى تحصل ومحصلتش !!

على أى حال انا برده مستمتعه انى عملت حاجه جديده فى حياتى .. الحمد لله .

المشكله بقى فى انى كنت مفكره ان المكان هيبقى انظف من كده والناس بجد مهمله بشكل اللى ياكل ويشرب حاجه يرميها
مع ان فى سله يمكن مش متوفره كتير بس برده مش هيضر لو مسكوها فى ايديهم شويه لحد ما يشوفوا واحده !

وكمان المسجد متبهدل خالص وعاملين خشب كده على مساحه صغيره ف المكان كان زحمه أوى !

ع العموم أتمنى ان شاء الله لما أروحه المره الجايه يبقى أحسن !

سلام

4 comments

  1. سمكه واحده // February 9, 2010 at 12:04 AM  

    او حتي اي حد ياكل حاجه يحطها في شنطته علي الاقل علي ما يلاقي مكانت مناسب
    انا شنطتي بتبقي سله مهملات لحد ما اروح افضيها في البيت
    والله ومين سمعك
    انا نفسي يهتموا اوي بالمساجد اكتر من كده ونضافتها دي المفروض تبقي جميله وحلوه ونضيفه ايه بس ياريت حجات كتير تتغير
    ممكن اوي تبقي طايره من الفرح ومبسوطه واليوم جميل لكن حجات زي دي تضيقك وتعكنن اليوم
    ادعي ان شاء الله
    بكره يبقي احسن
    وكويس ياستي انك عملتي حاجه حلوه
    تحياتي

  2. Butterfly // February 9, 2010 at 8:09 PM  

    الحمد لله طبعا
    شكرا ليكى :)

  3. الأرمـوطــي // February 12, 2010 at 11:55 PM  

    انا مرحتش قبل كدة معرض الكتاب مع انى ساكن فى القاهرة وفى جامعة الازهر فى مدينة نصر جنبة يعنى لانى ببساطة مش من هوات القراءة يمكن عشان متعودتش على كدة من وانا صغير بس اواحد والله بيتكسف من نفسة لما بيلاقى ناس من اماكن غير القاهرة بتيجى مخصوص عشان كدة ان شاء الله هحاول اقراء وبالنسبة للفوضى فى الاماكن العامة فدى طبيعة المصريين الا من رحم ربى ربنا يهدى الجميع
    تحياتى ليكى

  4. Butterfly // February 13, 2010 at 10:08 PM  

    على فكره دى نقطه أنا نسيت أقولها
    انى كنت دايما بقول كده انى مش بحب القراءه الا حاجات بسيطه موضوعات معينه فى المجلات والجرائد وقصص قصيره وخصوصا قصص الأنبياء
    وبدأت موضوع أقرأ كتب ده بس السنه اللى فاتت أو اللى قبلها

    ابدأ انت بس وان شاء الله ربنا هيعينك ويصبرك :)

    وأهلا بيك فى مدونتى المتواضعه :)

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget