نظرا لشغل العواطليه اللى انا فيه الا حد ما من ساعه ما خلصت الكليه
فكنت بستغل بابا وبطلع مكانه الرحلات بتاعت المدرسه
طلعت رحله القاهره ورحله اسكندريه
طبعا انا طول الرحله عماله افكر فى الفرق بين الرحله اللى انا فيها والرحله اللى كنت طلعتها وانا فى المدرسه
وطبعا طبعا الفرق شاسع .. كفايه ان صحابى كانوا معايا ودلوقتى لوحدى :(

أولا الرحله اللى كنت طلعتها وانا فى اولى ثانوى كنا لسه بدأين نتحجب فكنا سايبين شعرنا وكانت الرحله مختلطه عادى والبنات كانت برقص عادى برده 

فى الرحله دى البنات كانوا محجبات ومرقصوش والحمد لله :)



ثانيا: ودى الحاجه اللى خلتنى اكتب الموضوع ده واعمل مقارنه
موضوع الأغانى
كان على أيامى - اه اصل انا من زمان أوى :D-
أغانى لمحمد فؤاد مثلا
اه كان قلبى وروحى وعمرى وكذاب مغرور وكانت الأغانى بقى اللى مشعلله شويه
الليله دى بتاعة هشام عباس ولا واحد ولا ميه بتاعة حكيم

الأغانى بقى اللى شغاله  اليومين دول 
 التوتو نى - نفسى اعرف يعنى ايه - وشربت حجرين ع الشيشيه والبانجو ده مش بتاعى :S
والغريبه ان الطلبه كانوا عايزينها تشتغل على طول حتى لما السواق شغل نجاة فى الأخر واحنا مروحين كانوا عايزينه يغيرها ويجيب الأغانى بتاعتهم !!

تفتكروا كمان 10 سنين لو جينا نعمل مقارنه الوضع هيتطور لحد فين ؟!



من يومين كنت فى القاهره ليه بقى .. اقولكوا !
كان فى اعلان مطلوب مدربين حاسب الى للسفر للسعوديه .. انا ماما وبابا وافضين اصلا انى اسافر اشتغل فى القاهره
فما بالكوا بقى لو قولتلهم هسافر السعوديه لا وكمان السعوديه لازم يبقى فى محرم .. اجيبوا منين ده ؟!

المهم بقولهم قالولى ابعتى اعدت اشدد فى الكلام ولو اتصلوا بيا ومرضتوش اروح انتوا حريين والكلام ده 
المهم بعت وفعلا اتصلوا بيا وروحت فعلا الغريب ان كل اللى قولتلهم كانوا خلاص مقتنعين انى هسافر انا محستش للحظه انى هسافر
هتقولولى امال روحتى ليه ؟! مانا جايلكوا فى الكلام اهه :)
انا كان كل همى فى اى حاجه بعملها انى اتعلم واشوف الدنيا واخرج من الخندق اللى ماما وبابا حطنى فيه طول عمرى 
اجرب عشان اتعلم يعنى...
المهم المفروض ان البنت اللى كلمتنى كانت قايلالى المعاد الساعه واحده ولظروف كده خلتها تخلى المعاد الساعه 11
وصلت هناك انا على 10:30 كده قعدوا يقولولى تشربى ايه والكلام ده حسيت ان فى حاجه مش طبيعيه
الحاجه دى بقى طلعت ان الراجل السعودى مش موجوده فى القاهره اصلا قال ايه جاى من اسكندريه والأخ موصلش غير الساعه 2:30
شوفتوا الفقعه دى لوحدها تخلينى اقول مش راحه السعوديه تانى ابدااا :D

المهم كانت جت بنت من زفتى خريجه تربيه نوعيه مقدمه فى نفس الموضوع اتعرفنا على بعض
انا نسيت كل حاجه وكل تركيزى انتى ليه عايزه تسافرى ؟؟ مدورتيش على شغل هنا ليه ؟؟ حاولى تدورى تانى .. وهكذا ...
وكان نفسى اعمل ده مع كل واحد وواحده دخلوا المكتب ده
كمان كونى انى شوفت ده بعينى غير انى بسمع ان الشباب متمرمط بجد ومش الشباب بس ده الشعب كله كبير وصغير!
جايز أغير رأيى ولو انى مفتكرش :)

بيتهيألى أصلا ان اختراع شركات التوظيف ده مش موجود غير فى مصر بس !!
وعندى احساس ان كلهم نصابين :S
وعلى فكره الصوره اللى فوق دى مش الشركه اللى كنت فيها ده انا صورت صوره وانا فى الميكروباس من فقعتى من كتر كميه شركات التوظيف اللى شوفتها فى الطريق :@

انا عارفه ان ظروف المعيشه صعبه وان معظم الشباب ان مكنش كلهم نفسهم يسيبوا البلد ويهجوا
بس انا رأيى ان مهما كان الذل اللى فى بلدك فانت فى الأخر فى وسط أهلك وناسك أحسن ميت مره من انك تروح بلاد الناس يذلوك بفلوسهم ويكسروا نفسك ويخلوك تكره نفسك وبلدك اكتر واكتر ..!

وفى نفس الوقت طبعا الشباب اللى متخرج ده عاوز يبنى نفسه على الأقل يجيب فلوس عشان يقدر يتجوز
مقولتش يفضل مش بيعمل حاجه هنا او يذل نفسه فى اى شغلانه
لأ انا معاك سافر ووفر لنفسك الامكانيات اللى تخليك تعيش مرتاح بس اول ما توصل لمستوى كافى مش مهم يكون كويس اوى
ارجع بلدك افتح فيها مشروع له علاقه باهتماماتك وبتخصصك ساعتها مش انت بس اللى هتستفاد لا انت كده هتفيد بلدك كلها وهتساعد فى انها تبقى احسن ولو بخطوه على الأقل متبقاش شاركت الأغلبيه فى ضياعها ..!!!

أخيرا المكسب الوحيد من اخر سفريه دى انى مشيت فى الشارع والدنيا بتمطر :D


السلام عليكم
فتره طويله أوى بعدت فيها عن المدونه وعالم التدوين كله تقريبا!
بس بقالى فتره عاوزه أرجع لها لأنها وحشتنى جدا, بس عماله افكر هكتب عن ايه .. الغريبه ان الأحداث اللى بتحصل فى حياتى كتير
وبالرغم من ده مش عارفه اكتب عن ايه !!!

المهم لقيت كل الناس بقت بتكتب عن السنه الجديده وايه اللى انجزته والقرارات اللى اتخذتها السنه اللى فاتت ويتمنوا ايه فى السنه الجديده
فقلت اعمل زى الناس :)

ولكن كنت برده بكسل وقلت اخليها ليلة راس السنه اللى هو امبارح, للأسف انشغلت جداا بحاجات كتير فى البيت وخروج وكنت باقلى فتره عاوزه أعمل تورته بس برده بكسل فاخدها حجه وعملتها والحمد لله طلعت حلوه وقولت اصورها واحط صورتها احسن ما اعمل ديزاين
بالفوتوشوب وميطلعش اد كده :$ .. ولكن للأسف اول ما فتحت الجهاز لقيت الخبر المؤسف بتاع انفجار اسكندريه
بصراحه نفسى اتسدت وقلت مش هحطها :(

مش عارفه ليه لازم ينكدوا علينا بصرف النظر عن موضوع المسيحيين والمسلمين والكلام اللى ملوش لازمه ده لأن من الأخر
" لكم دينكم وليا دين " 
مش هقول اكتر من كده فى الموضوع ده !!
وكمان لأن الموضوع ممكن ياخد ابعاد تانيه زى الخبر اللى لسه قرأه من شويه عن الصيادله اللى بيتهموا الموساد 

بس خلينى مع الأغلبيه انهم مسلمين ارهاب
احب اقولهم ممكن تقولولى ايه الفرق دلوقتى بينكم وبين اسرائيل اللى احنا طول عمرنا عمالين نلعن فيهم مش بسبب انهم محتلين فلسطين بس لأ بسبب اللى بيعملوه فيهم من اهانات وبهدله وعدم احترام لأدميتهم ؟؟!!!

بجد بجد اتمنى من كل قلبى ان السنه الجديده تبقى احسن بكتير علينا كلنا
مش فى مصر بس لا فى كل الدول ومش على المستوى الشخصى بس لأ وعلى المستوى العام كمان ..

سنه سعيده ان شاء الله
:)

Get widget