من يومين كنت فى القاهره ليه بقى .. اقولكوا !
كان فى اعلان مطلوب مدربين حاسب الى للسفر للسعوديه .. انا ماما وبابا وافضين اصلا انى اسافر اشتغل فى القاهره
فما بالكوا بقى لو قولتلهم هسافر السعوديه لا وكمان السعوديه لازم يبقى فى محرم .. اجيبوا منين ده ؟!

المهم بقولهم قالولى ابعتى اعدت اشدد فى الكلام ولو اتصلوا بيا ومرضتوش اروح انتوا حريين والكلام ده 
المهم بعت وفعلا اتصلوا بيا وروحت فعلا الغريب ان كل اللى قولتلهم كانوا خلاص مقتنعين انى هسافر انا محستش للحظه انى هسافر
هتقولولى امال روحتى ليه ؟! مانا جايلكوا فى الكلام اهه :)
انا كان كل همى فى اى حاجه بعملها انى اتعلم واشوف الدنيا واخرج من الخندق اللى ماما وبابا حطنى فيه طول عمرى 
اجرب عشان اتعلم يعنى...
المهم المفروض ان البنت اللى كلمتنى كانت قايلالى المعاد الساعه واحده ولظروف كده خلتها تخلى المعاد الساعه 11
وصلت هناك انا على 10:30 كده قعدوا يقولولى تشربى ايه والكلام ده حسيت ان فى حاجه مش طبيعيه
الحاجه دى بقى طلعت ان الراجل السعودى مش موجوده فى القاهره اصلا قال ايه جاى من اسكندريه والأخ موصلش غير الساعه 2:30
شوفتوا الفقعه دى لوحدها تخلينى اقول مش راحه السعوديه تانى ابدااا :D

المهم كانت جت بنت من زفتى خريجه تربيه نوعيه مقدمه فى نفس الموضوع اتعرفنا على بعض
انا نسيت كل حاجه وكل تركيزى انتى ليه عايزه تسافرى ؟؟ مدورتيش على شغل هنا ليه ؟؟ حاولى تدورى تانى .. وهكذا ...
وكان نفسى اعمل ده مع كل واحد وواحده دخلوا المكتب ده
كمان كونى انى شوفت ده بعينى غير انى بسمع ان الشباب متمرمط بجد ومش الشباب بس ده الشعب كله كبير وصغير!
جايز أغير رأيى ولو انى مفتكرش :)

بيتهيألى أصلا ان اختراع شركات التوظيف ده مش موجود غير فى مصر بس !!
وعندى احساس ان كلهم نصابين :S
وعلى فكره الصوره اللى فوق دى مش الشركه اللى كنت فيها ده انا صورت صوره وانا فى الميكروباس من فقعتى من كتر كميه شركات التوظيف اللى شوفتها فى الطريق :@

انا عارفه ان ظروف المعيشه صعبه وان معظم الشباب ان مكنش كلهم نفسهم يسيبوا البلد ويهجوا
بس انا رأيى ان مهما كان الذل اللى فى بلدك فانت فى الأخر فى وسط أهلك وناسك أحسن ميت مره من انك تروح بلاد الناس يذلوك بفلوسهم ويكسروا نفسك ويخلوك تكره نفسك وبلدك اكتر واكتر ..!

وفى نفس الوقت طبعا الشباب اللى متخرج ده عاوز يبنى نفسه على الأقل يجيب فلوس عشان يقدر يتجوز
مقولتش يفضل مش بيعمل حاجه هنا او يذل نفسه فى اى شغلانه
لأ انا معاك سافر ووفر لنفسك الامكانيات اللى تخليك تعيش مرتاح بس اول ما توصل لمستوى كافى مش مهم يكون كويس اوى
ارجع بلدك افتح فيها مشروع له علاقه باهتماماتك وبتخصصك ساعتها مش انت بس اللى هتستفاد لا انت كده هتفيد بلدك كلها وهتساعد فى انها تبقى احسن ولو بخطوه على الأقل متبقاش شاركت الأغلبيه فى ضياعها ..!!!

أخيرا المكسب الوحيد من اخر سفريه دى انى مشيت فى الشارع والدنيا بتمطر :D

5 comments

  1. elahlawy // January 7, 2011 at 8:09 PM  

    انتي عارفة بقى اللي ضايقني في الموضوع ده
    انهم طالبين بنات بس وميكونوش متجوزين
    !!
    طب على اساس ايه ؟؟
    عموما لو فيها خير ربنا يقربهولك .. دا لو عايزة تسافري اصلا
    :D

  2. Butterfly // January 7, 2011 at 10:23 PM  

    اه قال ايه عشان متقولش تاخد اولادها معاها
    وعلى فكره لو الموضوع مضايقك اوى فى الشركات دى نظام انك بتروح تملى ابليكيشن ولو فى حاجه تنفعك بيتصلوا بيك
    بس نصيحه منى بلاش

  3. safa7_karmooz // January 8, 2011 at 2:00 PM  

    فكسااااان محمد فكسااااان

  4. Timo.. // January 15, 2011 at 4:44 AM  

    يااااه..
    للدرجة دي البلد فيها قوي عاملة..ومش عاملة..!!
    البلد دي فيها طاقة اسمها شباب عاوز يشتغل.. ومش عارفة تستغلها..!!
    الدنيا بقت ماشية بالمتشقلب..او مش ماشية خالص..

    الحمد لله على كل نعمة مهما كانت صغيرة..
    انا ديما فاكر الكلمة اللي بتقول (اشكر ربك على ما عندك..لأن اللي عندك..حلم كبييير لغيرك)
    الحمد لله..

    بوست حلو وطريقة السرد جذابة بس ياريت تطولي اكتر عشان باحب التفاصيل جدااا :)

  5. Butterfly // January 15, 2011 at 3:01 PM  

    ده انا مش بحب اطول عشان الناس مش تزهق وانا نفسى مش بحب البوستات الطويله
    بس هحاول حاضر :)

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget