عارفين الفيلم ده طبعا
فاكرين لما دخلت الجامعه مامتها وباباها قالولها ايه
الأم : ركزى على العريس يا نجيبه
الأب : ركزى على القبة يا نجيبه

ندخل فى الموضوع بقى طبعا انا متقليش الكلام ده ولا حاجه وجه التشابه انى كنت امر من نجيبه كده 
داخله على عالم غريب مريب مش فاهمه فيه اى حاجه ولا حتى كنت اعرف هو انا المفروض البس ايه
ولا كنت ببص للبنات لابسين ايه عشان البس زيهم وابقى على الموضه والكلام ده
وخصوصا انى كنت راجعه من سنتين متواصلتين من السعوديه مفيهومش غير مزاكره
وعمرة وحج حتى المصريين اللى كنا بنزورهم وكده مكنوش كتير
وكمان انا من طبعى مش اجتماعيه اوى مبحبش اتكلم كتير وقليل لو اتعرفت على حد جديد 

كان كل اللى بيحصل انى اروح احضر المحاضرات والسكاشن بصرف النظر عن انى زى ما كنت بدخل كنت بخرج
مفهمتش اى حاجه .. وكان الكل بقى فاكرنى البت الدحيحه اللى حافظه الكتب والورق والمحاضرات
كل ده عشان كنت بحضر لكن حد سألنى انتى فاهمه ؟ ابدااااا
وحتى لما كان حد بيسأل واقول لأ مش فاهمه يفتكرونى بضحك عليهم !!

المهم دلوقتى وبعد ما خلصت هذه المرحله انا اتوجهلى سؤالى غير جوهرى بالمره

وانتى مطلعتيش من الكليه بعريس؟ مفيش عريس من الكليه كده ؟!

السؤال الجوهرى بقى بيقول 
هو انا كنت داخله الكليه ليه ؟؟؟

بصرف النظر على انى مركزتش على القبة فأنا كمان مركزتش على العريس
انا كان كل همى انى اخرج من الكليه دى وخلاص بأقل خسائر ممكنه

كان فى واحد زميل بابا قالى السؤال اللى مش جوهرى ده من سنه كده بعد ما خلصت على طول يعنى
رديت عليه قلتله .. هعمل ايه يعنى همشى أدور عليه ؟؟!

قالى لأ بس يعنى حد من زمايلك اعجب بيكى وقالك ولا حاجه
فى الحالات اللى زى دى البنات الطبيعيه بتقول اه طبعا دول كتير جداا 
انا بقى كان ردى مختلف تماما
قولتله لأ .. انا طريقة تعاملى مع زمايلى جد جدا ميحسوش انهم بيكلموا بنت أساسا .. كلنا رجاله زى بعض

قالى طب ما ده العادى على أيامنها كان الواحد يمشى مع واحده لكن لما ييجى يتجوز يتجوز واحده ممشيش معاها

قولتله ده كان زمان دلوقتى اللى بيمشى مع واحده هى اللى بيتجوزها

وتقريبا انتهى النقاش على كده

انا مش هعلق اكتر من كده هسيبلكوا انتوا المهمه دى :)


6 comments

  1. موناليزا // June 23, 2011 at 5:34 PM  

    تعليقى لا يختلف عن تعليقك على فكرة
    وكأنك بتتكلمى عن لسانى

  2. Mada // June 23, 2011 at 9:02 PM  

    ههههههه طيب لما البنت بدور علي القبه والعريس الولد هيدور علي البنات بطريقه سهله عارفين انهم داخلين لهم هدف برضو انهم يلاقوا الواد الكويس اللي البنت هتجوزوا

    عموما البنات بتزيد فعلا بطريقه صعبه بقت مشكلة والاكبر ان الاهل مازالوا مصممين علي التقاليد والمبالغ الكبيره مع اني لاحظت البعض يحاول ان يغير من هذا الروتين اللي بيودي البنات ورا البحر

    الجامعه هي مكان تعليم زي ما انتي قولتي مش مكان الواد يدور فيه علي نصه التاني

    " مع ان نص الجامعه ناس حبيبه "

    بس هي دي مصر الحبيبه

  3. ENG./ELSAYED,PMP // June 24, 2011 at 1:39 PM  

    بجد:(
    اللى بيمشى معاها هيه اللى بيتجوزها ؟!
    يا ريتنى كنت معاهم ...(:

  4. Butterfly // June 25, 2011 at 11:52 PM  

    @ موناليزا
    يارب الكل يبقى كده


    @ Mada
    للأسف فعلا ان معظم الطلبه بقوا كده
    ربنا يعدل الحال

    @ ENG./ELSAYED,PMP
    عدلتها مش عارفه الناس اللى واقفالى على كل كلمه كتروا ليه اليومين دول :)

  5. نـــــــــــــور // June 26, 2011 at 10:19 PM  

    تصدقى الكلمة دى لسه حد قريب منى جدا كان قايلهالى من كام يوم؟؟
    يالسخريه القدر :)

    بس استهبال يعنى
    انا ردى كان هو انتى بتلومينى على انى كنت مؤدبه ومش مايصه!!!

  6. Butterfly // June 27, 2011 at 11:02 PM  

    هههههههه حلو الرد ده يا نور
    شاطره :D

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget