انا اللي حواجبي مرفوعة
وضحكتي سهلة ممنوعة
انا اللي مشاعري في قلبي
وصوتي ماتعرفه ميوعه
انا اللي جد وقت الجد
وتهريجي بيقلب جد
يعز عليا اموت من الضحك
وشايفه الهم موت حد
بحاول ابتسم لكن مافيش فرصة
بضارب بالامل والحلم في البورصة
بتنهار اسهمي لكن ولا يائسة
ولا بنسي
وبفرد ضحكتي علي وش بقي اقسي
وبفرض ضحكتي وانا بالوجع حاسة
انا العيان وانا الدكتور
وانا الضلة اللي شايلة النور
انا الملكة وانا الحراس وانا الابواب وانا ابقي السور
انا المسموح..انا الباب.. اللي لوتحسبله الف حساب
ماتدخلهوش ولومفتوح
انا الغامض انا المشروح
انا الجامد اوي المجروح
انا الوطن اللي عامل شعب
وانا الشعب اللي مش مغلوب
انا مظاهرة بقالها كام سنة ماشية
بتتحدف يوماتي بطوب
ولا بترجع ولا بتهدأ وتتنازل عن المطلوب
ولا بتقبل حلول في النص
ولا بتحود عن المسار
انا اللي حتي في موتي
بجد مصممة اني اختار
انا متاهة في الاستقرار
اقول ليه للحمار يا اسد وهو حمار؟؟!!
انا الواضحة..اللي بتصيبك بالاستفسار
ومقتنعة ان فعلا كل شئ ممكن
مافيش ولا حاجة مش ممكن
جميع ماشوفته في الدنيا ارادة
وصلت لقرار
 



نورعبدالله

0 comments

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget