الحمد لله الفترة اللى فاتت ربنا عوضنى وبدأت الاقى شغل على أرض الواقع اللى هو الكورسات، يمكن اه انا مش حاباها أوى وعاوز أشتغل عملى أكتر بس انا شايفاها كويسه برده انى أعلم غيرى وخصوصا لما أبقى بتبع أسلوب معين خاص بيا وكمان بيخلينى أطور وأنمى نفسى أكتر..!


أحمد الله من أول كورس اديته مستويين عملتلى اسلوب وسمعه كويسه والطلبه كانت بتشكر فيا وكانوا طلبة كليات هندسه الأزهر والدلتا وكان مستواهم كويس بالرغم انى كنت بضغط عليهم وبقولهم انهم مستهترين.

أما المجموعه الثانيه كانت طلبة جامعه خاصه، أظن مش محتاجه أحكى ولا أوضح يعنى ايه!بس هوضح !!

منتهى الاستهتار وعدم الالتزام والدلع و و و و و، وبالفعل بدأت المقارنه...لا اللى قابلكم أحسن بكتيـــــر!!!

وقدرا من حوالى شهر ونصف جالى تليفون وانا بره من سنتر معين بيطلبوا أعمل انترفيو، قولتلهم يااه ده من زمان أوى، قالتلى اه معاده بكره الساعه 4 !! قولتلها مانا جيت عملت انترفيو قبل كده قالتلى خلاص تعالى وهاتى شغلك معاكى!

انا قولتلها 4 ماشى ربنا يسهل، وانا من جوايا 99% مش جايه.

هى حاسة من نبرة صوتى قالتلى طيب يعنى هستناكِ ولا ايه ؟!

قولتلها بصراحه 4 ده متأخر أوى قالتلى خلاص هقفل واتصل بيكِ كمان شويه، طبعاً انا قولت مش هتتصل مفيش 5 دقائق واتصلت تانى تقولى تحبى الساعه كام قولتلها والله أنا جمبكم دلوقتى لو عاوزنى أجى ومش معايا لا CV ولا شغلى ولا حاجه ممكن اديكى اللينك تتفرجوا! قالتلى طيب وروحت واى نعم فضلت لاطعانى كتير على ما جت من الفرع التانى بتاع الجامعه، وطلعت هشتغل فى قسم الحاسب الآلى فى كلية العلوم وكنت أول مره أعرف ان فى حاجه كده بجد بعد الورق اللى بيتوزع!

وبدأت المشاكل من تانى يوم وبما انى واحده أصلا ملتزمه فى مواعيدى من غير حاجه والاستاذه اللى قابلتنى كمان أكدت عليا ده.

أروح قبل ميعادى وأقعد استنى الطلبه لحد ماتيجى يعنى بالنصف ساعه.

وكان يوم الاثنين الموافق 11-11-2013 وبدأ الصوت العالى وأكتشفت انى أتعامل مع طلبة الدبلومات ..! حيث عدم الجديه والاحترام والفهم ولكن مع وجود الفلوس اللى هو ال Money .

وهذا ما يهم الاداره وما يفهمه الطلاب " أنا هنا بفلوسى " أخد شهاده من غير ما أفهم، من غير ما أحضر، من غير ما أتعب نفسى ولا أحل فى امتحان حيث كانت امتحانات أعمال السنه وحيث انه حين يغضب الطلاب من شئ فى المحاضره يجروا يشتكوا للسكرتيره .. اذن نفهم انه شغل عيال وحرقة دم!


يارب صبرنى

فرحة غير مكتملة

لا أعرف من اين ابدأ كلامى .. هل مثل باقى الشعب بأن ..

اهنئ الشعب المصرى على تخلصهم من حكم الاخوان ؟ أم أعزيهم على الشرعيه التى ضاعت بما فعله العسكر ؟

 أقول يسقط حكم المرشد أم يسقط حكم العسكر ؟

هل حقاً ما حدث انقلاباً عسكرياً ؟ هل الفريق السيسى حقاً رجلا متدين لا يطمع فى السلطه والحكم ولم يكن أمامه سوى هذا القرار بعد المده الزمنيه التى اعطاها لمحمد مرسى كى يخرج بكرامته دول اى اهانه ؟


دعونى ابدأ بموقفى من الاخوان المسلمين؟

طيلة عمرى لم أكن أتكلم ولا أفهم فى السياسه ولا اعتقد اننى كنت أسمع عن شئ اسمه الاخوان، ولكن بدأت بادراك مثل هذه الكلمه بعد دخولى الجامعه اى منذ 15 عام تقريبا .. لم أكرههم ولا ابغضهم وكنت اتعامل بطريقة عادية جداً .. ولكن بالمقابل كان هناك شئ فى داخلى غير متقبل الفكره - فكرهم واسلوبهم - وليس وجودهم كمصريين او كبشر !

لحين ان قرأت منذ عامين تقريباً كتاب عقيدة أهل السنه والجماعة ل الشيخ عبدالعزيز بن عبدالله ابن باز، دعونى أكتب نبذه مما فى الكتاب ...

تعريف الجماعة فى اللغة : مأخوذة من مادة جمع، وهى تدور حول الجمع،والاجماع :والاجتماع وهو ضد التفرق.

"الجماعة فى اصطلاح علماء العقيدة" : هم سلف الأمة، من الصحابة والتابعين، ومن تبعهم بإحسان إلى يوم الدين، الذين اجتمعوا على الحق الصريح من الكتاب والسنه.

"أهل السنة والجماعة" : هم من كان على مثل ما كان النبي - صلى الله عليه وسلم - وأصحابه، وهم المتمسكون بسنة النبي - صلى الله عليه وسلم - وهم الصحابة ، والتابعون ، وأئمة الهدى المتبعون لهم ، وهم الذين استقاموا على الاتباع وجانبوا الابتداع فى أى مكان وأى زمان ، وهم باقون منصورون إلى يوم القيامة.

 وهذا كان تعليقى على الكتاب حين قرأته 

أسلوب الكتاب بسيط جدا حيث انه يضم الصفات الأساسيه للمسلمين أجمعين ولكن لا اعرف لماذا يطلقون الاسم على جماعه بعينها فهذه الصفات يجب ان يتصف بها كل مسلم!

 سوف اكتفى بالكلام فى هذه الجزئية...!


عندما جاء محمد مرسى الى السلطه ليس كان بمجهوداته او انجازاته او انجازات جماعته لكن جاء بعصر الليمون كما يقولون وبهذا ومن وجهة نظرى المتواضعه ليس معه اى شرعيه وليس هناك شئ اسمعه شرعية الصندوق فان كنتم نسيتم فأخر مده لمبارك كانت بعد انتخابات أيضاً حتى مع اختلاف الظروف والاسلوب ونسبة النتيجة فقد كانت بالصندوق!


النقطة التانية التى أود الكلام فيها هى استغرابى الشديد من ردود الفعل سواء ممكن فرحوا بقرارات السيسى او ممن غضبوا سواء كانوا اخوان ام لا .. أود ان اسألكم جميعاً سؤال واحد فقط ،

ماذا كان بخيالكم عندما خرج السيسى واعطى مده 48 ساعه لحل الأزمه. هل كنتم تتوقعون خروجه بعد ال 48 ساعه يقول للشعب عودوا الى دياركم فمحمد مرسى رئيس شرعى للبلاد وليس من حقكم الخروج عليه وعزله ؟!!!

ما فعله السيسى كان متوقع من اول ما أعطى مدة محدده يا ساده لماذا تضحكون على أنفسكم ولماذا كل هذه الانفاعالات التى ليس لها اى داعِ !


لا أنكر اننى عندما عرفت المده أعطاها السيسى فرحت فرحة راحه لا أكثر وبعدها مباشرة كتبت يسقط يسقط حكم العسكر لأننى من الناس التى لا تنسى ابداً الجرائم التى ارتكبت فى حق الشباب ومن القى فى الزبالة ومن سحلت وتعرت من قبل الظباط ولا اعتقد ان فى احد منهم حوسب الى الأن!

ولكن وبالمقابل لا أنسى عدم مشاركة الاخوان فى الثورة من بدايتها وكانوا اول من باعونا وذهبوا للتفاوض مع العسكر والشباب فى الميدان يضربون، ولكن بالرغم من ذلك تصالحنا معهم حتى لا يعود النظام القديم متمثلاً فى شفيق، وبعد فوز مرسى قمنا نتصالح مع النظام القديم ونتكاتف لنبنى مصر وسكتوا بالرغم من وجود الكثير ممن لا يقبلوا وجود الاخوان ولا مرسى رئيس، ولكن صمتوا ولم يعتصم منهم أحد ليعترض على النتيجة !

لماذا الأن تعترضون على زوال الاخوان ومرسى الذى انتقدتوه جميعاً على أداءة طيلة العام ، هل تخشون فعلا ان تكونوا بترفضوا الاسلام وبقاء مصر دولة اسلامية اذا ذهب مرسى ؟!

اذا كانت الاجابة بنعم، فردى عليك سوف لن يكون أكثر مما نقلته من الكتاب بالأعلى، كلنا متديونون ومسلمون يا سادة بالفطره وكلنا مذنبون أيضاً من قال ان الاسلام يتمثل فى شخص ومن أيضاً من شيوخنا الأفاضل قال ان يقترب أهل الدين بالسياسة؟!


أخيراً .. لا أنكر اننى لا استطيع أن أشعر بالسعادة التى شعرت بها حين تنحى مبارك عن الحكم، ولكن لا أعلم لماذا !

ولكن أيضاً أحسست بشئ من الاطمئنان عندما سمعت كلام محمد حسنين هيكل اليوم أنصح كل من يراوده القلق والحيرة مثلى أن يسمعه.




 اسأل الله أن يحفظ مصر وشعب مصر من الفتن ومن كل سوء ...








ملى فراغ جامد فى حياتى


علمنى شويه الصبر وطولت البال

والأهم انه خلانى أكتشف انى هبقى ام حنينه جدا :)



عارفه العنوان غريب بس اعتقد ان ممكن ناس تفهم قصدى على طول

وعارفه كمان ان غريب ان ده يبقى اول موضوع ليا فى السنه الجديده

لكنه يعتبر من الحاجات اللى انا عاوزه اغيرها فيا الا حد ما !!


اللى هم ايه بقى ؟؟

الوش الخشب


فى ناس كتير بتشتكى من انى دايما مكشره ومش بضحك كتير ومش بحب الهزار وبحب كل حاجه تبقى جد وصح!

مع انى شايفه ان ده مش غلط اوى يعنى بس قررت اتحكم فى نفسى اكتر ان شاء الله!

بس الغريب فى الموضوع انى بعمل مشاكل كتير وفى ناس مبتحبش تقرب منى او تتعامل معايا!

مع ان فى ناس كتير بتتعامل معايا عادى وشايفنى حاجه تانيه! :)


حاجه واحده بس عاوزه اوضحها ان مش شرط عشان مكشره ان اكون متخانقه مع حد او عامله مشكله او اى حاجه من الحاجات دى!

لأ فى معظم الأوقات انا ببقى زعلانه مع نفسى او بمعنى اصح بحاسب نفسى!

أيوه انا من النوع اللى بيحاسب نفسه دايما ودايما بفكر فى كل تصرف بعمله او اى كلمه قولتها او حتى اللبس اللى بلبسه

دايما بفكر هو انا زعلت الشخص ده بكلامى ؟؟ قولت حاجه حرجتهـ/ا ؟؟ اللبس اللى انا لابساه ده كويس ولا ملفت ولا ضيق ولا واسع ولا ولا ؟؟

ممكن ناس تفسر ده على انه قلت ثقه فى نفسى، بس انا شايفاها حساسيه زياده عن اللزوم وبرده فى ناس بتشوف حساسيتى دى حاجه غلط! بس انا شايفاها حاجه كويسه لانى بده بحاول على اد ما اقدر احافظ على شعور الناس اللى بتعامل معاهم.


الخلاصه فى واحده صاحبتى مره قالت عليا

انى نوع انقرض من زمان

ودى حاجه مفرحانى :)


كل سنه وانتم طيبين وعام سعيد علينا كلنا ان شاء الله :)



Get widget