تحرش

موضوع التحرش ده الللى انتشر مؤخرا او اللى فاكرينه انتشر مؤخرا .. لا يا سادة دى موجوده من زمان بس اللى كان بيعملها كان بيتدارى وممكن يبين حسن نية انه بيساعد فى حاجة وبعدين تبان نيته الحقيقية ، يعنى كل الفرق انه بقى على طول وعينى عينك!
وده فى نظرى بيرجع للدين والتربية واﻷخلاق اللى لﻷسف الشديد موجودين ومش موجودين!
اما بقى موضوع متجيبش الغلط ع البنت اللى لابسه كذا وتقارن ببتوع الثمانينات كانوا بيلبسوا ايه؟؟ اهو ده غباء تقديرى لا مؤاخدة! ليه بقى ؟!
ﻷن فى زمن الثمانينات الدين مكنش انتشر زى دلوقتى ولا كان فى كمية الشيوخ والدعاة اللى موجودين دلوقى!
ده الا جانب ان حتى التليفزيون مكنش فى كل بيت زى ما هو موجود دلوقتى بأفلامنا المنحطة التى لا تقل فى نظرى عن القنوات الاباحية اللى على القمر اﻷوروبى اللى هو برده هتلاقيه عند ناس كتير!
وبالنسبة بقى لردود فعل البنات والهاش تاج اللى اتعمل لا وكمان المسلسل الجديد - ولد ولود - هااهههه ما نكرش ان ضحكت على الكلمة بس أحب أقولكم ان اللى فى المسلسل ده هنشوفة فى الشارع قريب من بنات كتير والشباب يا مرحب يا مرحب ومش بعيد تلاقيهم بيمارسوا فعل فاضح فى الطريق العام زى ما بيقولوا وهتبقى ظاهرة عادية جدا ونبقى ولا شيكاغو!

متطلبش من حد حاجة

الفترة اللى فاتت تعرضت لمشكلة شخصية لﻷسف اتضريت استعين بأشخاص كان ليا علاقة قوية بيهم زمان وناس دلوقتى كمان وفى العلاقة القوية وفيه السطحية والحمد لله اكاد أقول انى ملقتش حد يقف جمبى لولا انى هكون ظالمة زيادة عن اللزوم فانا لقيت بنسبة 1% :) .

ضغط عصبى 

بسبب كل الظروف اللى حصلتلى الفترة اللى فاتت سواء شخصية أو عملية او حتى سياسية جالى ضغط عصبى لدرجة انى عضيت نفسى ومحستش :( ... وكل احاسيسى دى كنت متضطرة اداريها عن ماما وبابا عشان ميزعلوش وده كان بيزود اﻷلم اللى كان جوايا ويزود الضغط وتعب اﻷعصاب واكاد اقول الاكتئاب .. الحمد لله :) .


التدوين

بجد أشتقت للعالم ده جدا، احساسة مختلف تماماً!!
لﻷسف الفيس بوك وتويتر ضيعوا حق التدوين ولذته وكل مرة أقول هرجع اكتب ع المدونة تانى ارجع اكسل او انسى
لكن باذن الله المره دى هستمر ووعد بتدوينات جميلة الفترة القادمة :)

2 comments

  1. romansy // June 22, 2014 at 12:40 AM  

    اولا حمد الله على سلامتك وعودتك للتدوين يا بشمهندسه
    انا مش عارف ابدا منين ولا منين بس اللى اقدر اقوله ان فيه مشكله كبيره قوى قوى وهى فى الاصل مشكله اخلاقيه بنسبه كبيره قوى المشكله مش فى كده بس بيقولوا ان الشعب المصرى قادر انه ينظم حاله بس لاسف ثوره يناير زى ما هيه غيرت حاجات بسيطه قوى بس طلعت الوحش اللى فى الشعب المصرى بقى فيه بجاجه فظيعه
    ان شاء الله تعالى هتلاقى اللى يقف جنبك ويساعدك فى مشكلتك وهتلاقى الصديق وقت الضيق اللى هيساعدك وهياخد بايدك
    اما بالنسبه للتدوين فكلنا بنعانى من نفش المشكله الفيس تويتر ملمهش لذه زى التدوين والعالم الجميل اللى كنا عايشنيه ودا لان المدونه صديقه وبنفضفض فيها لكلل اللى احنا عاوزين نقوله
    انا اسف انى طولت عليكى بس الهم طاليك وطالينا

  2. Butterfly // June 23, 2014 at 7:09 PM  

    أهلا رومانسى
    الله يسلمك يارب
    فعلا مشكلتنا مشكلة أخلاقية تماماً
    ربنا يسترها معانا

:)) ;)) ;;) :D ;) :p :(( :) :( :X =(( :-o :-/ :-* :| 8-} :)] ~x( :-t b-( :-L x( =))

Post a Comment

Get widget