من حوالي أسبوعين، اتفرجت علي الفيلم ده .. انا فاكرة اني اتفرجت عليه قبل كده وغالباً بردة بكيت في الغالب هيبقي ساعة البطل ما اتضرب فعلاً وهي كانت مفكراه مقلب زي ما فهمت .. بس المرادي كانت مختلفة، المرادي اتأثرت جداً والسبب مختلف ... خرجت من الفيلم ده بنظرة واحساس مختلف تماماً!

ازاي هي  حبته بسهوله لمجرد انه كان زوج طيب وزوق وبيعاملها برقي مكنتش متوقعاه ولا هي أصلاً اتربت عليه .. فعلاً البنات كده بتتأثر أوي بأي كلمة حلوة، أقل كلمة وأقل معاملة ممكن ترضيها وتخليها تحب اللي قدامها !

ازاي هو بالرغم من كل اللي هي عملته علشانه، ووقوفها جمبة وكونها بقت زوجة وخادمة وممرضة وأم و و و، هو محبهاش!!!
مشفش فيها غير صديقة!!! .. فعلاً الأولاد عندهم عادي يتعاملوا بالأيام والشهور والسنين مع بنت بطريقة كويسة بأي نيه بقي مش مهم، المهم في الآخر هي بتحبه وهو يقولها انتِ فهمتيني غلط!، انتِ زي أختي !

اد ايه البنت لو قلبها اتكسر صعب أوي انك تعرف تداوية، بل كل الحب ممكن يتحول لكره وعداوه جبارة يستحيل علي أي حد انه يوقفها !!

ليه هو محسش بقيمتها غير لما بعدت؟! .. ليه محبهاش غير لما اتعاملت معاه بقسوة وعدم مبالاه أو تقدير لأي حاجة بيعملها؟!
ليه لما عرفت انها تحمل في أحشائها قطعة منها، أصبحت أكثر عدوانية ؟!

في الفيلم رجعوا لبعض علشان هي لسه بتحبه رغم كل اللي عمله، وهو حبها بعد كل اللي عملته!  ...فيلم هندي!!!
بس معتقدش ان في الواقع كان هيحصل كده، علشان اللي بيتكسر مبيتصلحش، علشان الكرامة غالية أوي، علشان أصعب حاجة علي أي أنثي انها تتهان في أنوثتها!

اد ايه وصي الرسول عليه أفضل الصلاة والسلام بالنساء، لو الجنس الآخر فعلاً اتعلم دينه صح هيفكر مليون ألف مرة قبل ما يعمل أي حاجة مع الاناث .. أرجوكم راجعوا نفسكم، اتقوا الله في معاملاتكم، مش هينفعك حاجة انك تحس ان في واحده حبتك وفي الأخر انت سيبتها! مش هيذود في رجولتك حاجة لأنك أصلاً في الحالة دي متبقاش راجل أصلا!

اتقوا الله ما استطعتم!

Get widget