واحده صاحبتى عندها 37 سنة بتقولى أنا خايفه أوى يا سيما كلها 3 سنين ويبقى عندى 40 سنه و أنا لسه متجوزتش أنا انتهيت ! من كام شهر قابلتها صدفة لاقيتها حامل بقولها يا حقيرة اتجوزتى معزمتنيش ليه ضحكت وقالتلى اتقدملي اطيب راجل فى الدنيا تخيلي اكبر مني ب3 سنين بلظبط كان بيحبنى وانا معرفش كان بيقولى كنت بدعى ربنا يبعدك عن اى راجل عشان تكونى ليا لحد ماابقي قادر اكرمك فى بيت وحياه تليق بيكى و معملناش فرح سافرنا بره اسبوعين وكل حاجه حصلت فى شهر أنا فرحانه اوى الحمدلله ربنا رضانى !
.........
واحده حكتلي إن جارتها كانت مخطوبة لشاب زى القمر كانو بيحبو بعض من ثانوى وهيه بتحضر لشقتها خطيبها مسك دماغو وأغمي عاليه و طلع عنده ورم خبيث فى المخ طلبت من اهلو انه ميعرفش وانها هتتجوزو حتى لو هيموت يوم الفرح وفعلا اتجوزو وكانت بتراقبو كل يوم وبتبص على بطنو بيتنفس ولا لاء وبعد 5 شهور جواز صحيت وهو ميت جنبها على السرير فى يوم راحت للدكتور اللى متابع حاله جوزها تسأله أنا غلطت لما ماقولتلوش انه عيان ؟ قالها كان عارف وكان بيجى لوحده يتعالج لما سالته انتا عارف انك هتموت اتجوزتها ليه بتظلمها معاك ليه قالى لازم كنت اتجوزها كان لازم احضنها كان لازم أشم ريحتها و أبص فى عنيها كان لازم أعيش لحظات الحب القليله معاها لإنى موش هعيش تانى منا ممكن اكون كويس واموت برضو ليه اتحرم منها ليه .. هيه ممكن تتجوز لما اموت لكن انا هتحرم منها بعد ايام معدوده .. أنا دلوقتى موش زعلان انى هموت عشان هموت وأنا فرحان وراضي !
.........
واحد معرفة قديمه وعشره عمرى قابلتو فى عيد ميلاد صدفه لاقيته معاه واحده شكلها اكبر منو وفعلا باين جدا بقولو يا محمد مين دى قالي دى الاميره ست البنات بنت قلبى وحبيبتي دى مراتى يا سيما ايوا أكبر منى ب 14سنه بس دى إللي لما بشوفها بلاقيها غير كل البنات اللى من سنى البنت دى أجدع وانضف زوجه ممكن ربنا يبعتها لراجل وعلى فكره اهلى مافتحوش بقهم مكنش ينفع يتدخلو اصلا كفايه انى اروح الاقيها بتقولى كلام حلو وهادى كفايا لما بتاخدنى فى حضنها كفايه ذكائها ودمها الخفيف وطبيخها العسل أنا بعيش اجمل ايام حياتى وموش ندمان دى اللي هتبقي أم ولادى وسندى طظ فى الناس أنا هعيش مره واحده وهعيش صح مع اكتر واحده حبتنى من قلبها أنا فرحان وراضى !
..................................................................................
متفوتوش فُرص الحب !
إنتي أكبر منو إتجوزيه ومتفكريش فى خالتك وعمتك وصاحبتك وانتى اكبر وانتى اصغر دول عالم مريضه نفسيا وبيكرهو الفرح !
إنت أصغر منها طيب منتا راجل ولا إيه هو الراجل بيعيبو حاجه بلعكس أتجوزو وافرحو وامبسطو طظ فى الناس وطظ فى نظرتهم وفى كلامهم وتريقتهم منتا ممكن تتجوز واحده من سنك وتكَبرك انتا فى السن من نكدها وقرفها وزنها وجنونها مبتحصلش !
محدش يقول انا انتهيت لانك متعرفش مستخبيلك ايه الدنيا نصين نص حلو ونص وحش إللي أخد الحلو يستنى وإللي اخد الوحش يستنى برضو ربنا مابيظلمش حد !
عندك مرض ما طظ وستين طظ ممكن تبقى بصحتك تتزحلق فى الحمام تموت تانى يوم جوازك مابتحصلش ؟
مفيش حاجه فى الدنيا تستاهل اننا نمنع سعادتنا حتى لو يوم لو ساعه لو لحظه عشان محدش عارف اصلا هيكمل الساعه دى ولا لاء !
العمر أقصر من انكم تكملو السطر ده !
عيشو وحبو و إفرحو !
الحياة رحلة استمتعو بيها وطظ فى النهايات !


‫#‏سهام_شعبان‬


Get widget